الى متى يا جماهير الكرامة

بعد كل خسارة او تعادل .... نفس الاشخاص ... .... وكانو شلة وبيحكو نفس الحكي .. ومن خلال مناقشاتي مع الجمهور لاحظت انو الانتقادات كلها كانت تتناول الامور التالية :
1 - ليش نزل تامر ... واسطة ؟؟ ....وانا قاعد بالسرفيس قالولي وليش مانزل بدل عنو فهد لك مشان الله شو علاقة تامر بفهد وضليت عم اشرحلن وما فهمو ....
تامر وعادل عبد الله بيلعبو ارتكاز يعني وسط متاخر وفهد وسط مهاجم وشتان بين مهمة الاثنين على ارضية الملعب القصة انو بعد اعتزال حسان الارتكاز عنا عم يعاني من مشكلة لانو جابو عادل قام انصاب مع المنتخب وركزو على كلمة جابو عادل لان ابو شاكر لو بدو يلعب تامر غصب عن الجمهور متل ما البعض عم بيقول ما كان جاب عادل ... يعني في عنا عادل وتامر عادل مانو بمستواه منوب وخاصة بعد الاصابة وتامر نزلناه بلعبة تايلند وشفنا انو ما بيغطي مظبوط وهادا المركز حساس كتير واللعب فيه صعب والغلطة فيه مصيبة وطالما نو ماحدا عم يغطي مكان حسان ... حب ابو شاكر يلعب بلاعبين ارتكاز مشان يعزز هادا المركز ولما شاف الوقت عم يمر والفريق ما سجل قام سحب واحد منن ونزل بدالو وسط مهاجم هوي النكدلي ومن الطبيعي انو يسحب عادل لانو طالع من اصابي
2 - ليش سحب حيان .... ؟؟؟؟؟ كل العالم عم تنتقد ابو شاكر .... لك يااخي فرصتين قدام الغول ماحطن والفريق لازم يسجل شاف المدرب انو هالمهاجم يا اخي ماعم يشوف الكول وفي الو بديل نزل الزينو ... وين المشكلة
3 - المشكلة بابو شاكر .... طيب مين البديل ؟؟؟؟؟ وليش ما بتقولو انو المشكلة بلعيبة المنتخب يلي ممنوعين يدربو مع الفريق حسب قوانين اتحاد الكرة السوري وعم يبعتولنا اياهن قبل العبة بيوم واحد .... والفريق السنة كلو عناصر جديدة يعني اما اجانب فابيو وماكيتي او محليين زينو وعادل والحسين او شباب متل النكدلي والمواس يعني بحاجي لانسجام مع بعضن ... وهادا مستحيل كرمال المنتخب بدل ما اتقولو انو المشكلة بابو شاكر ليش مابتشوفو المشاكل يلي عم يعاني منها ابو شاكر يعني بيكفي نقول مدرب بدون لعيبتو الاساسيين .... وبدون مدير فريق لاتزعل وبدون ادارة موجودة على راس عملها ...
4 - معقول ومهما كانت الاسباب ....الجمهور يضرب اللاعبين باناني المي وابو شاكر ينسب من الجمهور ... ليش خيو شو عمل الزلمي تعادل مع النواعير ؟؟؟ السنة الماضي الكوكورن درجة تالتي طالع ريال مدريد من كاس ملك اسبانيا وبخسارة مذلة ليش مين قال ان الكرامة لا يحرق ولا يغرق .. تايتانيك .. ما بصير يتعادل اخي الكرامة متل كل الفرق بيربح وبيتعادل وبيخسر وما على راسو ريشي
5 - الفريق السنة انعملو اعادة هيكلة .... وبهيك حالي لازمو وقت واجا الحظ السيئ انو اللعيبة الاساسيين يلي بحاجي للانسجام مع الفريق كلن مع المنتخب وما عم يدربو مع الفريق
6 - لي عتب على ابو شاكر ... يا اخي يا ابو شاكر ليش ما بتطلع على منتدانا وبتوصل فكرتك للناس وبتحكيلنا ليش هيك عم يصير بالفريق